MAYAMAN
KA (HINDI
NGA LAMANG HALATA)
Yaman Blg. 1:
Malakas
at Magandang Kalooban
BIYERNES.
Nagtagal nang bahagya si Alma sa paaralang pinagtuturuan. Kaya’t
malaong lagpas na ng takipsilim nang madaanan niyang muli ang
bantayog sa plasa. Madilim na at halos wala nang tao sa pook na
iyon pagsapit at paglagpas ng orasyon. Napakaaga kasing natutulog
kahit ang pinakasentro ng bayang Don Manuel.
Nginitian
niya ang makinang na istatwang nakatayo sa pedestal, maningning na
kumikislap ang bagong kapipintang mukha ni Rizal sa liwanag ng mga
ilaw na pasan ng mga posteng animo’y nakatanod sa magkabilang
tabi ng monumento.
Sa
pagkatingin ni Alma sa mukha ng monumento ni Rizal, para bang
nakangiti rin ito sa kanya. Kaya napuno siya ng galak, at di niya
napigilang sumaludo rito.
Halos
ganap nang kumagat ang dilim sa mga sandaling iyon. Nagpatuloy
siya sa paglakad, nang ang ulo’y nakalingon pa rin sa bantayog
na nalagpasan na niya. Kaya’t si Alma, ang batambatang guro sa
Manuel Miranda Memorial High School ay nagulantang nang mapaharap
sa patunguhan ng kanyang paglakad at tumambad sa kanyang paningin
ang pangkat na iyon. Mga binatilyong pawang nakatayo na’t
handang-handa nang sumalubong sa kanya. At nagitla siya sa sumunod
na pangyayari…
*
* *
NOONG
kasisimula pa lamang niya bilang guro sa bayang iyon,
asiwang-asiwa talagang magdaan si Alma sa bahaging iyon ng
poblasyon. Para bang dumadagundong ang tibok ng puso niya hanggang
sa malayong makalagpas doon.
Kung
bakit naman kasi tila nagpabaya ang pamahalaan ng baranggay nang
mapundi ang mga ilaw. Kaya’t pati ang rebulto ni Rizal ay
lantarang iniihian ng mga lalaking istambay; dahil sa sobrang
dilim ay di naman sila makikitang talaga.
At
may mga magkakabarkadang kay-aga naman yatang natutong uminom, at
sa oras ng pagdaan niya pauwi mula sa paaralan ay medyo lasing na
ang ilan sa kanila.
Mga
binatilyo pa lang pero parang matagal nang bahid sa malisya at
kawalang-direksyon.
Nitong
nagdaang Lunes, dalawa sa mga iyon ay maaga yatang nagsimulang
uminom at tinablan na sa utak, kaya’t paglampas niya ay
sinipulan nila siya, isang mahabang pagsipol na mula sa himig ng
isang malaswang awitin. Palibhasa’y lasing na nga, o baka naman
talagang bingi sa musika, ang dweto ng mga sipol mula sa awiting
iyon ay lumiko nang malayo sa tono.
At
ang buong grupo ay humalakhak. Binilisan na lamang ni Alma ang
paglakad niya at hindi man lamang niya sila nilingon. Mahina na sa
pandinig niya ang patuloy na pagta-tawanan nang makalayo siya sa
kanila.
Pagdating
sa bahay na tinutuluyan, humi-hingal at maluha-luhang isinalaysay
ni Alma sa kanyang Tiya Melay ang kagaganap na pangyayari.
Pinagsakluban naman ito ng galit at takot. "Kung buhay pa
sana ang Tiyo Freddie mo, maipapakulong niya ang mga walanghiyang
iyon!" wika nito.
Napabuntong-hininga
si Alma, at nagsabing "Sabagay, mga bata pa kasi sila. Baka
naman magbabago pa’ng mga ‘yon. Sana nga, magbago pa sila…"
Napailing
ang kausap niya. "Di na mag-babago ang mga iyan! Kaya nga
nasipa sa skwela n’yo, dahil magugulo, laging nasa basag-ulo,
inuman, sugal, baka nga pati droga, eh! Hindi kasi naituwid noong
talagang mga mus-mos pa. Pag lumalaki na ang puno nang baluk-tot,
papano mo pang itutuwid?
"Tiyang
naman!" sagot ni Alma sa pagitan ng paghigop sa mainit na
sabaw na ihinain ng matanda, "pinaksa ko iyan sa klase ko
kanina. Habang buhay pa, may pag-asa pa! May pag-asa pang magbago
ang mga iyon, dahil iba naman po ang tao sa puno na matigas sa
paglago. At ang bawat tao, kahit parang napa-kasama, kahit
kriminal na nga, ay may kabutihan pa rin naman sa kaloob-looban,
di lang nakikita. Sila mismo, di nila alam! Sana talaga, magbago
pa sila"
"Hay
naku, itong pamangkin kong saksakan ng bait! Siya na nga ang
binastos, siya pa ang nagpupumilit umuunawa! Basta, mula bukas
papasamahan kita sa pinsan mong si Anding. Mahirap na! O, nainin
na pala itong sinaing. Magsasandok na ako’t nang makakain na
kitang dalawa, hane?"
Para
kay Aling Melay, tapos na ang usapang iyon. Sanay na rin siya sa
pamangking ito na kahit noong mas bata pa ay talagang napakaganda
ng kalooban. Hindi nagagalit nang matagal. Tinitiis na lang ang
mga pinaghihirapan. Napakamatulungin na, napakamaawain pa!
Napakabait talaga. Lumabas sa bibig ng matanda ang mga kataga ng
pagsuporta kay Alma… "Sana nga! Sana nga!"
Pero
nagulat siya sa itinugon dito ni Alma. "Pero hindi na po yata
sapat para sa akin ang ‘sana,’ Tiyang, ako mismo, tutulong
akong mapagbago sila. Mag-iisip ako ng paraan. Kailangang
matulungan ko sila!"
Halos
mabitiwan ng matanda ang hawak niyang mga baso sa narinig sa
pamangkin. Kanina lamang ay maputlang maputla, hinihingal at halos
umiiyak pa itong si Alma, tapos ngayo’y nagbabalak pang tumulong
sa mga iyon? Magmalasakit sa mga nambastos na nga sa kanya?
"Maanong
huwag ka nang makisangkot pa diyan!" Parang walang narinig si
Alma. Sa pakiwari ng kanyang magulang, nagsimula nang gumawa ng
plano ang dalagang kahit tahimik ay para namang kinakausap ang
sarili. Noon naalala ni Aling Melay ang kabilang bahagi ng
pagkatao ng kanyang pamangkin. Malakas ang loob nito. Handang
makipagsapalaran sa mga pagsisikap na maari niyang ikasadlak sa
panganib, basta’t para sa kapakanan ng kapwa. Tama. Oo nga pala,
si Alma ay may magandang kalooban at malakas pa ang loob niya.
Kahit mahirap na mga gawain, minsang ipasya niya, ay hinding-hindi
niya susukuan! Napailing at napabuntong-hininga na lang si Aling
Melay.
Kinabukasan,
nang magpaalam si Alma bago pumasok sa pagtuturo, sinabihan niya
ang kanyang magulang, "Tuloy na po ako. Ipagdasal n’yo
sanang magtagumpay ang binabalak kong gawin mamaya, bukas at
samakalawa, sa buong linggong ito!"
"Ano
pa nga ba ang magagawa ko, kundi iyon na nga, ang ipagdasal ka?
Hindi naman kita mapipigilan kahit mahirap o kahit mapanganib pa
nga ang binabalak mo, eh!"
Tawa
lamang at masuyong halik ang isinagot ni Alma bago siya nanaog.
*
* *
AT
NOON ngang dumating na ang Biyernes, matapos niyang madaanan,
ngitian at saluduhan ang bantayog ni Rizal, biglang tumambad kay
Alma ang pangkat ng mga binatilyong pawang nakatindig at nag-aabang
sa kanya.
Nagulat
siya nang sila ay biglang mag-palakpakan!
"Ma’am!
Kayo ni Rizal ang mga bayani namin!"
Buong
kagalakan naman siyang lumapit sa kanila at sumagot na "Di
lang si Bonifacio, si Rizal, si Tandang Sora, o kahit isama pa ako,
sa totoo lang, kayo ang mga bayani ng Don Manuel ngayon.
Napakagaling pala talaga n’yo! Napakarami n’yong natapos sa
tatlong araw lang! O, palakpakan natin… kayo!"
Sumunod
ang masayang palakpakan.
Nagpatuloy
si Alma. "O tingnan n’yo, ang saya-saya na natin, ang
liwa-liwanag na rin tuloy dito, pati si Rizal, masaya na’t
napintahan na, nailawan pa! Pati iyong damo rito, malinis na
malinis na!"
"Eh,
Ma’am, kasi nga…
Pinutol
niya ito. "Ate Alma! Di ba, sabi ko ‘Ate Alma’ na lang
ang itawag n’yo sa ‘kin?"
"Kasi
nga po, Ate Alma, kung di n’yo kami kinausap nung Martes…
tsaka si Kapitan Louie, si Mang Tonyo at si Mr. Miranda, di naman
mangyayari lahat ‘to eh! Pati nga mga magulang namin tuwang-tuwa!"
"Eh
akala pa nga namin kakagalitan n’yo kaming lahat dahil sa
pagsipol namin sa nyo noon…"
"At
kaya naman tayo kinausap ni Ma— ni Ate Alma nung Martes ay dahil
mukha pa tayong matino. Di pa tayo nakakainom noon! Hahaha!"
"At
di na kayo iinom, di ba? Pangako n’yo yun! Wala na ring
siga-sigarilyo! Para matuloy ang mga pinag-usapan natin tungkol sa
pagbalik n’yo sa iskwela."
"Yes,
Ma’am!"
"Yes,
ano?"
"Ay,
oo nga pala! Opo, Ate Alma!
* * *
WAKAS
1.
Malakas, Magandang Kalooban
(Ang
Bathalang Kalooban ay Pangunahin sa Ating mga Yaman)
Nasa
ubod ng pagpapakatao at pakikipagkapwa-tao ang Kislap ng
Bathala na nasa kalooban nating lahat. Bathalang Kalooban
ang tinutukoy na Malakas at Maganda sa alamat na binuo ng
ating mga ninuno ukol sa ating pinagmulan bilang lahi –-
ganda ng kalooban upang makipagkaisa at gumawa ng
mabuti sa kapwa, at lakas ng loob at tiwala sa
sarili upang kayanin na pangahasang simulan, matatag
na pagpursigihan at ganap na ipagtagumpay ang mabuting mga
hangaring ito. Ang magandang loob at lakas ng loob ay
Bathalang Kalooban, na siyang pangunahing yaman ng bawat
tao, kasama na tayo, sapagkat ayon nga kay Emilio Jacinto
ay iisa lamang ang pagkatao ng lahat. Madalas nga
lamang na maraming tao ang di pumapansin dito, isang
pagkalaki-laking yaman na sinasayang lamang!
|
|